Internet history-a data breach lian ber tia sawi a nih takah chuan cybersecurity expert-te chuan database lian tak, username leh password tluklehdingawn 16(Billion) chuang awmna an hmuchhuak. He leak hian service hrang hrang a nghawng a, Apple, Facebook, Google, Telegram, GitHub, leh sorkar portal thlengin a nghawng niin Forbes report chuan a tarlang.

He thil hi Cybernews-a zirchiangtute chuan an hmuchhuak a, Vilius Petkauskas kaihhruaina hnuaiah hian kum 2025 tir lam aṭang khan he leak hi an chhui ṭan a ni.

He team hian dataset hrang hrang 30 an hmuchhuak a, pakhatah hian exposed login record maktaduai tam tak thleng a awm a ni.

Data leak-ah hian email address, password leh direct login URL te a tel a, hei vang hian a hlu hle a, a hlauhawm hle bawk.
Mithiamte chuan hei hi data hlui recycle mai a ni lo tih an sawi a, a hmaa report loh,dan bawhchhiatna thar a awm a ni.
Data tam zawk hi infostealer malware leh credential-stuffing attack hmanga lakkhawm a ni a, hacker-te chuan password hriat tawh hmangin account dang luhchilh an tum a ni.

He dan bawhchhiatna lo chhuahna hi cybercriminal operation tam tak nena inzawm a ni a, mahse a puan chhuah dan kimchang erawh hriat a ni lo.

Leaked credentials hian online platform lian zawng zawng deuhthaw a huam a, social media, developer tools leh sorkar system te pawh a huam tel a ni.