Elon Musk’s company, xAI Holdings chuan sum thar dollar tluklehdingawn 20 thawhkhawm tumin hma an la mek niin Bloomberg report chuan a tarlang. An hlawhtlin chuan xAI hi $120 billion chuang man a ni thei ang. Hei hi private funding round lian ber pahnihna tur a ni ang — tun hnaiah OpenAI hian $40 billion zet a lalut.
He pawisa hian Musk-a social media company, X (Twitter ni thin) aṭanga leiba lian tak a neih chu a rulh theih phah dawn a, thla tin interest pekna atan chauh dollar maktaduai 200 vel a seng ṭhin. Nikum kum tawp lam khan kum khata interest senso chu dollar tluklehdingawn 1.3 chuang a tling tawh a ni.
He sum thawhkhawmna lian tak hian investor-te chu artificial intelligence (AI) chungchangah an la phur hle tih a tilang chiang hle. Politics-a Musk-a nghawng a neih chhoh zel dan pawh a tarlang bawk a, a bik takin President Trump-a White House chhehvelah a ni.
Musk hian hun rei tak chhunga a investor ṭhenkhat, Valor Equity Partners aṭanga Antonio Gracias leh Gigafund aṭanga Luke Nosek te aṭangin ṭanpuina a dawng ngei tura ngaih a ni. Gracias hian sorkar hnathawh that zawkna tur project pakhatah pawh Musk hi a pui mek a ni.
xAI hian engmah comment a la nei lo.